The Battleground Manila Bay

Sa pagtatapos ng Buwan ng Kasaysayan ngayong Agosto na may temang: “Kasaysayan, Kamalayan, Kaunlaran”, ating balikan ang dalawang pangunahing labanang naganap sa Look ng Maynila. Una, ay ang panimulang sagupaan sa pagitan ng mga Amerikano at Espanyol noong 1898, at ikalawa ay ang labanan ng mga Hapon at pinagsanib na pwersang Pilipino-Amerikano noong 1944.

Ang Look ng Maynila ay isang semi-enclosed na daluyan ng tubig na umaabot sa 190 kilometro. Ang baybaying ito ay sumasakop sa mga lalawigan ng Bataan, Cavite, at Pampanga. Tanyag ang Maynila bilang isang pook-kalakalan para sa mga lokal at pang-rehiyong ugnayan ng Timog-Silangang Asya, bago pa man ang panahong kolonyal noong ika-16 na siglo Common Era (CE). Nang sinakop ni Miguel Lopez de Legazpi ang Maynila noong 1571, ito ay naging sentro ng kalakalan at palitang kultural sa pagitan ng Asya, mga Amerika, at Europa sa tulong ng kalakalang galyon ng Manila-Acapulco.

Ang digmaan sa pagitan ng armadang Amerikano sa ilalim ni Commodore George Dewey at ng hukbo ng mga Kastila sa ilalim ni Admiral Patricio Montojo ay naganap noong ika-1 ng Mayo 1898. Napataob at winasak ng plotilya ng Estados Unidos ang pwersa ng Espanya. Kabilang sa mga lumubog at nasirang hukbong-dagat ng mga Kastila ay ang Marquis del Deuro, Isla de Luzon, Don Juan de Austria, Isla de Cuba, General Lezo, at Argos. Nagbigay-daan naman ang tagumpay ni Commodore Dewey sa pagsakop ng Estados Unidos sa Maynila noong 1898.

Sa kabilang dako, ang teatro Pasipiko ng ikalawang Digmaang Pandaigdig ay nagsimula nang salakayin ng mga pilotong Hapon ang mga puwersang Pilipino-Amerikano sa Look ng Maynila, maging ang ibang mga lugar ilang oras lamang pagkatapos ng pag-atake sa Pearl Harbor, Hawaii noong Disyembre 1941. Binomba ng mga Hapon ang mga himpilang isla na nakapalibot sa Look ng Maynila katulad ng Corregidor, Caballo, El Fraile, at Carabao na pumoprotekta sa kabisera ng Pilipinas. Ang umiigting na pagsalakay ng mga Hapon ang nag-udyok sa pagsuko ng sandatahang Pilipino at Amerikano noong 1942. Noong 1944, bumalik ang mga puwersang Amerikano sa ilalim ni Heneral Douglas MacArthur sa Pilipinas at nagpasimula ng walang humpay na pag-atakeng panghimpapawid, pandagat, at pangkatihan mula Enero 1945, at kalaunan ay matagumpay na napalaya ang Corregidor Island, Caballo Island, El Fraile Island, at Carabao Island noong April 1945. Kabilang sa mga lumubog at nasira sa naturang digmaan sa Look ng Maynila ang mga destroyer ng Hapon, IJN Akishimo, IJN Hatsuharu, IJN Satsuki, at ang cruiser IJN Nachi, maging ang USSB-1, USSB-2, USSB-3, at USS Canopus (AS-9) ng Estados Unidos.

#BattleOfManilaBay #Battleground #WWII #MuseumFromHome #NationalMuseumPH

Poster at teksto mula sa Maritime and Underwater Cultural Heritage Division

© 2022 Pambansang Museo ng Pilipinas